Општина Штип на обука за обврзници во Хрватска

Од денес до 25 март, Проектот за локална самоуправа финансиран од Американската агенција за меѓународен развој (УСАИД) организира студиска посета во Република Хрватска.

Оваа студиска посета е дел од поддршката што Проектот за локална самоуправа на УСАИД  ја обезбедува на општините кои веќе учествуваат во програмата за добивање кредитен рејтинг (Гевгелија, Гостивар, Илинден, Куманово и Штип) и кои имаат изразено интерес да бидат меѓу првите општини во Република Македонија кои ќе извршат емисија на општински обврзници.

Во насока на натамошно развивање на пазарот на капитал за локалните самоуправи, а посебно пазарот на општински обврзници, а имајќи го во предвид позитивното искуство на хрватските општини во тој поглед, Проектот за локална самоуправа на УСАИД ја организира оваа студиска посета за група градоначалници и вработени од општините кои ќе бидат директно задолжени за водењето на целата процедура во врска со издавање на општинските обврзници.

Во рамките на планираната студиска посета, самите учесници ќе имаат можност да се запознаат со конкретните искуства на градовите Ријека и Сплит во областа на издавањето на општински обврзници, од аспект на подготовка, емисија и реализиација на проект.

Воедно, учесниците на студиското патување ќе ги посетат и објектите чијашто изградба била финансирана по пат на општински обврзници. Исто така, ќе  бидат одржани и состаноци со сите институции кои имале значајна улога во целиот процес, како што се Загребачка берза, Хрватска агенција за надзор на финансиските услуги (ХАНФА), како и Привредна банка Загреб, која ја имаше улогата на агент за издавање на општинските обврзници за неколку градови во Хрватска.

Покрај градоначалниците и вработените од општините, учесници на студиската посета ќе бидат и претставници на Министерството за финансии, ЗЕЛС и Комисијата за хартии од вредност.