Вести

Ѓорѓиевски: СЈО преку барањата за притвор сака да изврши притисок врз Апелација да не ги поништи неоснованите мерки за претпазливост 

СЈО води организирана, политички мотивирана хајка против ВМРО-ДПМНЕ и раководството на партијата, само за да му помогне на Зоран Заев и СДС. Целта е создавање на негативна слика за партијата во очи на претстојните локални избори, во корист на СДС, изјави утрово на прес-конференција пред Апелациониот суд Орце Ѓорѓиевски од ВМРО-ДПМНЕ.

-СЈО работи во полза на СДС и преку своите монтирани случаи создава материјал за медиумите кои им се под контрола да го оцрнуваат ВМРО-ДПМНЕ. Барањата за притвор на СЈО за раководството на ВМРО-ДПМНЕ се алатка за притисок врз апелациониот суд за да не ги поништи првостепените одлуки за одземање на патните исправи на истите, рече Ѓорѓиевски.

Барањата за притвор, како и мерите за претпазливост се целосно неосновани, без ниту еден доказ и апсолутно неаргументирани. Ѓорѓиевски доаде дека истите се засноваат исклучиво врз политички мотивирана агенда за хајка против ВМРО-ДПМНЕ.

-Тезите на СЈО дека истите се поради опасност од бегство на лицата за кои се бараат, се погрешни и тенденциозни. Лицата опфатени во барањата за изрекување на мерки за обезбедување на присуство или мерките за претпазливост се функционери кои уживаат углед во земјата и странство, истите често патуваат, во најголем дел службено, па доколку некој до сега сакал да избега можел тоа да го стори неколкукратно, изјави Ѓорѓиевски.

Раководството на ВМРО-ДПМНЕ нема сторено ниту едно кривично дело, нагласи Ѓорѓиевски и додаде дека токму заради тоа нема зошто да се впушта во бегство.

-ВМРО-ДПМНЕ верува во правниот систем на Република Македонија, кој донесува одлуки врз база на Уставот и законите, а не врз база на политички монтирани обвиненија кои се срам за правната наука. Судот не смее да делува по ничиј диктат и истиот не треба да подлегне под политички притисок на СДС/СЈО. Судот мора своите одлуки да ги темели исклучиво врз база на докази, заклучи Ѓорѓиевски.