„Кемет“ задоволни од квалитетот на кадарот, вработувањата ќе се зголемуваат

Вработувањата во „Кемет електроникс“ се остваруваат со поголема и побрза динамика од предвиденото.

Челниците се задоволни од условите за работа во Македонија и од квалификуваната работна сила.

Директорот на Агенцијата за индустриски и развојни зони, Виктор Мизо, за Курир вели дека веќе се вработени над 100 луѓе, а во почетокот на наредната година ќе се вработат уште 50.

-Во рамките на постоечкиот објект, вкупната бројка на вработувања треба да достигне до 500. Сопствениците велат дека во Македонија нашле плодна почва за реализирање на инвестицијата, но истовремено многу лојална и соодветна работна сила. Затоа, вработувањата се остварени со побрза од предвидената динамика, вели Мизо.

Луѓето кои започнаа со пробното производство, пред неколку месеци беа пратени на обука во Велика Британија и Италија, во постоечките погони на „Кемет електроникс“. Челниците на компанијата се многу задоволни од квалитетот на македонскиот кадар.

Сопственикот е задоволен што 90 отсто од вработените комуницирале на англиски јазик, употребувајќи ги своите вештини. Со другите нивни вработени од Балканот, тоа не било случај.

За Македонија првите луѓе од компанијата не штеделе пофални зборови.

-Диреторот на компанијата кажа дека посетата на Универзитетите, квалитетот на едукацијата и квалитетот на луѓето е нешто што е многу позитивно за Македонија. Она што го виделе во Македонија за нив било над очекувањата, вели Мизо за Курир.

Досега „Кемет електроникс“ во фабриката вложи 20 милиони долари, а вредноста по доаѓањето на сите машини ќе биде над 35 милиони долари.

Фабриката се простира на површина од 11 илјади метри квадратни и 9 илјади метри квадратни производствен капацитет. Во моментов има две производни линии, а треба да се пуштат уште седум. Моментално се 100 вработени, до март 2013 треба да достигнат 150, до крајот на 2013 – 250, а до заокружување на инвестицијата со дополнителни 10-15 милиони долари ќе достигне 500 вработувања.

Инаку Американската компанија Кемет е со 85-годишна историја со седиште и два иновативни центри во Јужна Каролина, САД. Производствени објекти има во Мексико, Кина, Италија, Ангалија, Финска, Шведска, Португалија, Индонезија, Германија, Бугарија.